Isaiah · Hebrew Tanakh (Original)

Isaiah 12

1וְאָֽמַרְתָּ בַּיּוֹם הַהוּא אוֹדְךָ יְהוָה כִּי אָנַפְתָּ בִּי יָשֹׁב אַפְּךָ וּֽתְנַחֲמֵֽנִי ׃

2הִנֵּה אֵל יְשׁוּעָתִי אֶבְטַח וְלֹא אֶפְחָד כִּֽי ־ עָזִּי וְזִמְרָת יָהּ יְהוָה וַֽיְהִי ־ לִי לִֽישׁוּעָֽה ׃

3וּשְׁאַבְתֶּם ־ מַיִם בְּשָׂשׂוֹן מִמַּעַיְנֵי הַיְשׁוּעָֽה ׃

4וַאֲמַרְתֶּם בַּיּוֹם הַהוּא הוֹדוּ לַֽיהוָה קִרְאוּ בִשְׁמוֹ הוֹדִיעוּ בָֽעַמִּים עֲלִֽילֹתָיו הַזְכִּירוּ כִּי נִשְׂגָּב שְׁמֽוֹ ׃

5זַמְּרוּ יְהוָה כִּי גֵאוּת עָשָׂה מידעת זֹאת בְּכָל ־ הָאָֽרֶץ ׃

6צַהֲלִי וָרֹנִּי יוֹשֶׁבֶת צִיּוֹן כִּֽי ־ גָדוֹל בְּקִרְבֵּךְ קְדוֹשׁ יִשְׂרָאֵֽל ׃ פ

Study Isaiah 12