Psalms · Hebrew Tanakh (Original)

Psalms 101

1לְדָוִד מִזְמוֹר חֶֽסֶד ־ וּמִשְׁפָּט אָשִׁירָה לְךָ יְהוָה אֲזַמֵּֽרָה ׃

2אַשְׂכִּילָה ׀ בְּדֶרֶךְ תָּמִים מָתַי תָּבוֹא אֵלָי אֶתְהַלֵּךְ בְּתָם ־ לְבָבִי בְּקֶרֶב בֵּיתִֽי ׃

3לֹֽא ־ אָשִׁית ׀ לְנֶגֶד עֵינַי דְּֽבַר ־ בְּלִיָּעַל עֲשֹֽׂה ־ סֵטִים שָׂנֵאתִי לֹא יִדְבַּק בִּֽי ׃

4לֵבָב עִקֵּשׁ יָסוּר מִמֶּנִּי רָע לֹא אֵדָֽע ׃

5מלושני בַסֵּתֶר ׀ רֵעֵהוּ אוֹתוֹ אַצְמִית גְּֽבַהּ ־ עֵינַיִם וּרְחַב לֵבָב אֹתוֹ לֹא אוּכָֽל ׃

6עֵינַי ׀ בְּנֶֽאֶמְנֵי ־ אֶרֶץ לָשֶׁבֶת עִמָּדִי הֹלֵךְ בְּדֶרֶךְ תָּמִים הוּא יְשָׁרְתֵֽנִי ׃

7לֹֽא ־ יֵשֵׁב ׀ בְּקֶרֶב בֵּיתִי עֹשֵׂה רְמִיָּה דֹּבֵר שְׁקָרִים לֹֽא ־ יִכּוֹן לְנֶגֶד עֵינָֽי ׃

8לַבְּקָרִים אַצְמִית כָּל ־ רִשְׁעֵי ־ אָרֶץ לְהַכְרִית מֵֽעִיר ־ יְהוָה כָּל ־ פֹּעֲלֵי אָֽוֶן ׃

Study Psalms 101