Psalms · Hebrew Tanakh (Original)

Psalms 149

1הַלְלוּ יָהּ ׀ שִׁירוּ לַֽיהוָה שִׁיר חָדָשׁ תְּהִלָּתוֹ בִּקְהַל חֲסִידִֽים ׃

2יִשְׂמַח יִשְׂרָאֵל בְּעֹשָׂיו בְּנֵֽי ־ צִיּוֹן יָגִילוּ בְמַלְכָּֽם ׃

3יְהַֽלְלוּ שְׁמוֹ בְמָחוֹל בְּתֹף וְכִנּוֹר יְזַמְּרוּ ־ לֽוֹ ׃

4כִּֽי ־ רוֹצֶה יְהוָה בְּעַמּוֹ יְפָאֵר עֲנָוִים בִּישׁוּעָֽה ׃

5יַעְלְזוּ חֲסִידִים בְּכָבוֹד יְרַנְּנוּ עַל ־ מִשְׁכְּבוֹתָֽם ׃

6רוֹמְמוֹת אֵל בִּגְרוֹנָם וְחֶרֶב פִּֽיפִיּוֹת בְּיָדָֽם ׃

7לַעֲשׂוֹת נְקָמָה בַּגּוֹיִם תּֽוֹכֵחֹת בַּל ־ אֻמִּֽים ׃

8לֶאְסֹר מַלְכֵיהֶם בְּזִקִּים וְנִכְבְּדֵיהֶם בְּכַבְלֵי בַרְזֶֽל ׃

9לַעֲשׂוֹת בָּהֶם ׀ מִשְׁפָּט כָּתוּב הָדָר הוּא לְכָל ־ חֲסִידָיו הַֽלְלוּ ־ יָֽהּ ׃

Study Psalms 149